Nanao filazàna varotra fiara tanaty vondrona fivarotana iray tao anaty Facebook ny lehilahy iray. AUDI Q5 ny fiara ary nisy ny liana avy hatrany tamin’ny fividianana azy. Tovovavy no niantso hoe te hividy ilay fiara sady hiady varotra. Natao ny fotoana ka roa vavy izy ireo no tonga teo amin’ny toerana nifanarahana, Analakely. Mbola tanora tokoa satria vao 24 taona monja i F., raikitra ho 95 tapitrisa ariary ny fiara rehefa vita ny asy varotra farany. Nanao taratasim-bola ary izy nony hanome ny vola, tsy nanaiky nefa ilay mpivarotra fa nanahy hoe sao dia sheky tsy misy vola akory io.
Tsy nisalasala ny tovovavy fa nilaza hoe andao ary hiaraka any amin’ny banky haka ilay vola ka izy sy ilay tovolahy no hankao amin’ny banky fa ilay tovovavy anankiray no miandry ao anaty fiara ka omena azy ny fanalahidy sy ny taratasy ary ny lakilen’ny fiara. Rehefa tonga teo amin’ny banky nefa dia nanjavona ny tovovavy, nitady azy eraky ny birao ilay tovolahy fa tsy fantany hoe lasa aiza izy. Rehefa nasehony ireo mpiasa tao amin’ny banky ny sheky dia nambaran’izy ireo fa sheky hosoka ilay nomena azy. Ny fiara izay nijanona tany ivelany koa efa nanjavona tsy teo amin’ny toerany intsony.
Nametraka fitoriana sy filazàna fahaverezana avy hatrany tany amin’ny polisy misahana ny ady heloka bevava sakelika faha dimy ilay tovolahy. Niainga ny fanadihadiana sy ny fikarohana rehetra ka dia tratra teny Iavoloha teny an-tranony ireto tovovavy niaraka tamin’ilay fiara sy ny momba azy rehetra. Ny adiresy tamin’ireo taratasim-bola no nanampy be ny polisy ka nahitana azy ireto haingana, ary mbola hita tao ihany koa ny taratasy hosoka maro sy ody gasy. Raha ny filazan’ny polisy dia efa niaiky ny heloka vitany izy mirahavavy.
