Any Afrika Atsimo no antonta ny bileta tokana modely hampiasaina amin’ny fanentanana amin’ny fifidianana. Misy fenitra iraisam-pirenena tokony harahina no antony nanaovana ny fanontana any ivelany hoy ny fanazavan’ny filoha lefitry ny CENI Thierry Rakotonarivo. Mahatratra telo hetsy sy folo tapitrisa no isan’ny bileta hantonta ampiasaina mandritra ny fifidianana, ary ny vola avy amin’ireo mpiara-miombon’antoka no manohana amin’ izany. Mizara roa miavaka tsara ny bileta ho an’ny kandidà, fiarahamonim-pirenena ary ny CENI, ny voalohany dia ampiasaina amin’ny fanentanana, satria hisy soratra “specimen” na hoe “Maodely” eo afovoan’ilay bileta, ary ny faharoa dia ampiasaina amin’ny andron’ny fifidianana. Tsy nanambara ny vola lany hanontàna ireo bileta karazany roa ireo satria ireo mpiara-miombon’antoka no nanatanteraka ny tolo-bidy. Raha ny fanazavana azo ihany, dia tsy hihoatra ny folo andro ny famitana ity bileta ”maodely” ity.
