Namoaka fanambarana momba ny raharaham-pirenena ny avy eo amin’ny FFKM tamin’ny 19 aogositra lasa teo. Isan’ny voaresaka tamin’izany ny resaka fifidianana izay atao eto Madagasikara. Voalohany dia mamporisika ny vahoaka hanefa ny adidy amin’ny fandraisana anjara amin’ny fifidianana ireto mpitondra fiangonana ireto. « Mamporisika ny vahoaka andeha hifidy amin’ny fifidianana izahay ary hahay hifidy ny kandida hametrahana fitokisana hitondra ny tany sy ny fanjakana. Mahaiza mifidy mba tsy hanenenana any aoriana » hoy izy ireo tao anatin’ny fanambarana.
Notanisain’ny FFKM tao anatin’ity fanambarana ity ireo sivana vitsivitsy tokony hananan’ny olona izay hitondra an’i Madagasikara. Voalohany dia olona matahotra an’Andriamanitra Ray sy Zanaka ary Fanahy Masina io olona io hoy izy ireo. Olona vonona hanompo ny firenena sy ny vahoaka ary hita fa afaka hahavita zavatra tsara ho an’ity Nosy mamintsika ity ihany koa. Ankoatra izay dia tokony ho olon’ny fisokafana sy afaka hiara-hiasa amin’ny ankolafin-kery samihafa ihany koa ary indrindra dia olona manana fitondran-tena mendrika io olona ho filoha io.
Antso ho an’ny governemanta sy ny CENI. Isan’ireo niantefan’ny fanambarana nataon’ny FFKM ihany koa ny governemanta sy ny CENI. Ao anatin’izany ny fanamarinana ny lisi-pifidianana sy ny fikarakarana ny fifidianana araka ny tokony ho izy. Hiankinan’ny filaminan’ny zotram-pifidianana mantsy ireto andrim-panjakana anakiroa ireto. « Aoka ianareo hitandro ny fitantanana ny fifidianana, indrindra ny fanajana ny safidim-bahoaka tsy hiteraka krizy na olana intsony » hoy ny hafatra avy amin’ny FFKM. Nahazo hafatra manokana ihany koa ny Fitsarana avo momba ny Lalampanorenana ny amin’ny tokony hitandroan’izy ireo ny fahamarinana. Farany dia nampahery ny mpitsara ao amin’ny HCC ireo filoham-piangonana mba tsy hahadiso famindra na hahasolafaka azy ireo.
Raha fintinina dia miantso ny rehetra handray ny andraikitra tandrify azy tsirairay ny avy ao amin’ny FFKM mba hizoran’ny fanantanterahana ny fifidianana antsakany sy andavany ka tsy hisian’ny krizy intsony.
